冬菇滑雞飯

冬菇滑雞飯 - 懶人首選

由於大少唔食牛，樹樹唔食羊，所以諗煮咩餸時實在頗頭痛~ 想方便簡單得黎又好味，實在唔容易~ 經過一懷舊中式點賣緊北菇蒸雞飯，忽發奇想，唔知可唔可以返屋企用電飯煲整個冬菇滑雞飯呢﹖於是就膽粗粗係街市搜羅食材~

由返到屋企到灼埋菜連滾湯，大約一個鐘多少少，都好快就有飯開呢！大少食個陣無出聲，只係比平時快好多食完碗飯，夏天一向好少添飯既大少，竟然問我：「入面仲有無飯丫﹖」 我即刻問大少：「個飯好好味﹖」大少話：「係呀！好好味呀！」果然，呢個懶人飯搏得過~  事實上樹樹都覺得雞嫩滑入味、冬菇香、飯係精華所在，因為吸哂冬菇同雞既味道~

冬菇滑雞飯 (2人份量)


材料：

雞            半隻 (由於樹樹要為大少預備翌日飯盒，所以再買多左一個雞胸)
冬菇        8粒
薑            適量
芫茜        適量
米            2量杯 (放於米缸之量杯)

醃料一：
雞粉        1茶匙
糖            1茶匙
老抽        1湯匙
生抽        2湯匙
紹興酒    2湯匙
胡椒粉    適量

醃料二：
生粉        1茶匙
麻油        1茶匙

醃料三：
雞粉        半茶匙
糖            半茶匙
麻油        適量

做法：

1. 冬菇洗淨，浸軟切半，加入醃料三，備用；
2. 雞件先用醃料一醃20分鐘，再把醃料二加入拌勻，備用；
3. 薑切絲；
4. 芫茜切細段；
5. 米洗淨，加入浸冬菇水，份量約平時米水約8成左右，先煲；
6. 待電飯煲出煙中段後，於開始收水時加入雞件及冬菇，繼續煲；
7. 待電飯煲指示已完成煮飯後，加入薑絲及芫茜，再按煮飯掣煲一次；
8. 待煲好飯後，讓飯及雞件於電飯煲內焗10分鐘，才把電源關上，即成。

備註：

1. 若果要返工可於朝早上班前先浸冬菇；
2. 雞件可於街市買時請對方代勞起肉斬件，回到家中便可馬上醃，節省不少時間；
3. 用浸冬菇水煮飯，煮起飯特別有冬菇香味；
4. 電飯煲再煮會有飯焦，故需要按所吃份量酌量加多少少米煮；
5. 千萬別在煲飯尚未收水時加入雞件，否則變相白灼雞件，味道不同之餘雞件亦變鞋口；
6. 再煮多次因為樹樹放了差不多兩層雞件，若雞件數量不多或電飯煲較大，可以不用再煮，只需煮好後讓飯及雞件煲溫10分鐘才把電源關上。